கண்காட்சிப் போட்டியில் சன்ரைஸ் கழகம் சௌண்டர்ஸுடன் மோதல்

சீனன்கோட்டை சன்ரைஸ் கழகத்தின் 50 ஆவது ஆண்டு நிறைவையொட்டி அந்த அணி எதிர்வரும் ஞாயிற்றுக்கிழமை (10) கொழும்பு சௌண்டர்ஸ் கழகத்துடன் கண்காட்சிப் போட்டி ஒன்றில் ஆடவுள்ளது. இந்தப் போட்டி பேருவளை, நளீம் ஹாஜியார் விளையாட்டு மைதானத்தில் மாலை 6:15 மணிக்கு மின்னொளியில் நடைபெறவுள்ளது.

களுத்துறை உதைப்பந்தாட்ட சங்கத்தின் கீழ் பதிவு செய்யப்பட்டுள்ள சன்ரைஸ் கழகம் 1974 ஆம் ஆண்டு நிறுவப்பட்டதோடு இந்தக் கழகத்தின் மூலம் பல முன்னணி வீரர்களும் உருவாகியுள்ளனர். இந்தக் கழகம் தேசிய அளவில் இடம்பெறும் போட்டிகளில் சம்பியன் கிண்ணங்களை வென்றுள்ளமை குறிப்பிடத்தக்கது. இந்தக் கண்காட்சிப் போட்டியை ஒட்டி இடம்பெறும் 50 ஆண்டு நிறைவு விழா கழகத் தலைவர் யாகூப் நளீம் தலைமையில் இடம்பெறவுள்ளது. இதில் பல பிரமுகர்களும் பங்கேற்கின்றனர்.