மூன்று பரம் ருத்ரா சூப்பர் கம்ப்யூட்டர்கள் மற்றும் உயர் செயல்திறன் கொண்ட கணினி பொறிமுறைகளை பிரதமர் நரேந்திர மோடி நாட்டுக்கு அர்ப்பணித்தார். இந்த கட்டமைப்புகள் முறையே டெல்லி, புனே மற்றும் கொல்கத்தாவில் நிறுவப்பட்டுள்ளன.
“இந்தியாவின் விஞ்ஞானிகளுக்கு அதிநவீன வசதிகள் கிடைப்பதை உறுதி செய்வதில் இந்த சூப்பர் கம்ப்யூட்டர்கள் பெரும் பங்காற்றும்” என்று பிரதமர் கூறினார். “இன்று தொடங்கப்பட்ட மூன்று சூப்பர் கம்ப்யூட்டர்கள் இயற்பியல், புவி அறிவியல் மற்றும் அண்டவியல் ஆகியவற்றின் மேம்பட்ட ஆராய்ச்சிக்கு இவை உதவும்.” என்றும் அவர் தெரிவித்தார்.
“இளம் மனதில் அறிவியல் மனோபாவத்தை வளர்க்க, பாடசாலைகளில் 10,000 ஆய்வுகூடங்கள் அமைக்கப்பட்டுள்ளன. கூடுதலாக, STEM பாடங்களுக்கான உதவித்தொகை அதிகரிக்கப்பட்டுள்ளது,” என்று அவர் மேலும் கூறினார்.
கல்வியாளர்கள், ஆராய்ச்சியாளர்கள்,சூப்பர் கம்பியூட்டர்கள் மற்றும் ஸ்டார்ட்அப்களின் வளர்ந்து வரும் கணக்கீட்டுத் தேவைகளைப் பூர்த்தி செய்ய வலுவான சூப்பர் கம்ப்யூட்டிங் உள்கட்டமைப்பை நாட்டிற்கு வழங்க தேசிய சூப்பர் கம்ப்யூட்டிங் மிஷன் (NSM) நிறுவப்பட்டது. நாட்டின் கம்ப்யூட்டிங் சக்தியை உயர்த்துவதை நோக்கமாகக் கொண்ட முதல் முயற்சி இதுவாகும்.
தேசிய சூப்பர் கம்ப்யூட்டிங் பணியானது அறிவியல் மற்றும் தொழில்நுட்பத் துறை (DST) மற்றும் மின்னணுவியல் மற்றும் தகவல் தொழில்நுட்ப அமைச்சு (MeitY) ஆகியவற்றால் கூட்டாக நிர்வகிக்கப்படுகிறது. புனேவில் உள்ள மேம்பட்ட கணினி மேம்பாட்டு மையம் (C-DAC)பெங்களுர் இந்திய அறிவியல் கழகம் (IISc)என்பவற்றால் இது செயல்படுத்தப்படுகிறது.
இந்த சூப்பர் கம்ப்யூட்டர்கள் வானிலை மற்றும் காலநிலை, கணக்கீட்டு திரவ இயக்கவியல், உயிர் தகவலியல் மற்றும் பொருள் அறிவியல் போன்ற களங்களைப் பூர்த்தி செய்யும் பயன்பாடுகளுடன் பொருத்தப்பட்டுள்ளன. கணினி கற்றல் மற்றும் ஆழமான கற்றல் கட்டமைப்பின் மீது செயற்கை நுண்ணறிவு (AI) திறன்களை வழங்குகின்றன.
“இந்த ஆண்டு பட்ஜெட்டில், 21 ஆம் நூற்றாண்டு உலகிற்கு இந்தியா அதிகாரம் அளிக்கும் வகையில், ஒரு லட்சம் கோடி ரூபாய் ஆராய்ச்சி நிதி அறிவிக்கப்பட்டுள்ளது” என்று பிரதமர் மோடி மேலும் கூறினார்.
விண்வெளித் துறையில் இந்தியாவின் சாதனைகளை எடுத்துரைத்த பிரதமர், “2035ஆம் ஆண்டுக்குள் ‘பாரதிய அந்தரிக்ஷா நிலையத்தை’ அமைப்பதை இந்தியா நோக்கமாகக் கொண்டுள்ளது” என்று சுட்டிக்காட்டினார்.
2023 ஆம் ஆண்டில், சந்திரனின் தென் துருவத்தில் சந்திரயான்-3 வெற்றிகரமாக தரையிறங்கியது.இந்தியாவின் முதல் சூரியப் பயணமான ஆதித்யா-எல்1 ஏவப்பட்டதன் மூலம் இந்தியா புதிய உச்சங்களை எட்டியது. இந்த மைல்கற்கள் உலகளாவிய விண்வெளிப் பொருளாதாரத்தில் இந்தியாவின் நிலையை வலுப்படுத்தியது மட்டுமல்லாமல், நாட்டில் தனியார் விண்வெளித் துறையின் வளர்ச்சியையும் உயர்த்தியது.
விண்வெளி வீரர்களின் குழுவை சுற்றுப்பாதையில் செலுத்தி, அவர்களைப் பாதுகாப்பாக பூமிக்குக் கொண்டு வருவதன் மூலம், இந்தியாவின் கடல் நீரில் திட்டமிட்டு தரையிறங்குவதன் மூலம், மனித விண்வெளிப் பயணத் திறனை வெளிப்படுத்துவதை நோக்கமாகக் கொண்ட ககன்யான் பணிக்கு இந்தியா இப்போது தயாராகி வருகிறது.
குறைக்கடத்தி துறையும் இந்தியாவின் வளர்ச்சியில் ஒரு முக்கிய அங்கமாக மாறியுள்ளது என்று பிரதமர் மோடி குறிப்பிட்டார்.
இந்தியாவில் இதுவரை ஐந்து குறைக்கடத்தி அலகுகளுக்கு அரசாங்கம் ஒப்புதல் அளித்துள்ளது.ஏற்கனவே இரண்டு தளங்களில் கட்டுமானப் பணிகள் நடைபெற்று வருகின்றன. மீதமுள்ள 3 இடங்களில் பணிகள் விரைவில் தொடங்கப்படும். இந்நிறுவனங்கள் ஏற்கனவே 1.5 லட்சம் கோடி ரூபாய்க்கு ஒட்டுமொத்தமாக முதலீடு செய்துள்ளன. (ANI)
