மன்னார் மனித எலும்புக்கூடு விவகாரம்; பல்வேறு தீர்மானங்கள் முன்வைப்பு | தினகரன்

மன்னார் மனித எலும்புக்கூடு விவகாரம்; பல்வேறு தீர்மானங்கள் முன்வைப்பு

மன்னார் மனித எலும்புக்கூடுகள் விவகாரம் தொடர்பாக பல்வேறு தீர்மானங்கள் எடுக்கப்பட்டுள்ளதாக, காணாமல் ஆக்கப்பட்ட உறவுகள் சார்பாக நீதிமன்றில்; ஆஜராகும் சட்டத்தரணி வி.எஸ்.நிறைஞ்சன் தெரிவித்தார்.

மன்னார் மனித புதைகுழி விவகாரம் தொடர்பான கூட்டம், மன்னார் நீதிமன்றத்தில் நேற்று (22) மாலை நடைபெற்றபோதே, குறித்த தீர்மானங்கள் எடுக்கப்பட்டதாகவும், அவர் தெரிவித்தார்.

மன்னார் புதைகுழி விவகாரம் தொடர்பாக ஊடகங்களுக்கு மேலும் கருத்துத் தெரிவித்த சட்டத்தரணி வி.எஸ்.நிறைஞ்சன், 'மன்னார் மனித புதைகுழி சம்பந்தமான கார்பன் பரிசோதனை அறிக்கை உட்பட பல்வேறு அறிக்கைகள் கிடைக்கவுள்ள நிலையில், அவற்றுக்கான நினைவூட்டல் கடிதங்களை அனுப்பி அறிக்கைகள் பெறப்படவுள்ளன.

குறித்த அறிக்கையானது இடைக்கால அறிக்கை என்பதால், அதனை மாத்திரம் வைத்துக்கொண்டு முடிவெடுக்க முடியாது என்பதன் அடிப்படையில், பல அறிக்கைகள் கிடைக்கவுள்ளமையால்,  அவற்றுக்கான நினைவூட்டல் கடிதங்களை அனுப்பி அறிக்கைகளை பெற்றுக்கொள்ளத் தீர்மானிக்கப்பட்டுள்ளது' என்றார்.

அத்தோடு, மன்னார் புதைகுழி அகழ்வராய்ச்சிக்கு பொறுப்பான பேராசிரியர் ராஜ் சோம தேவவின்   அறிக்கையையும் பெற்றுக்கொள்வதோடு, இவ்விடயம் தொடர்பாக வைத்தியர்களின் அறிக்கைகளை அதாவது காயப்பட்டது எவ்வாறு?, இதில் என்ன இடம்பெற்றுள்ளது? போன்ற விபரங்கள் அடங்கிய அறிக்கைகளையும் பெற்றுக்கொண்டு, அனைத்து அறிக்கைகளையும் முழுமையாக வைத்துக்கொண்டு குறித்த நடவடிக்கையை ஆய்வு செய்து ஒரு முடிவுக்கு வரவேண்டியுள்ளது. 

குறித்த மனித புதைகுழியில் மீட்கப்பட்ட எலும்புகளின் மாதிரிகளை மீண்டும் ஆய்வுக்கு அனுப்பி அதற்கான பதில்களை பெற்றுக்கொள்வதா? எனவும் கூடி முடிவு எடுக்கப்பட்டது' என்றார்.

மேலும், எதிர்வரும் மூன்று மாத காலத்தில் அதற்கான அறிக்கையை  பேராசிரியர் வழங்குவார் எனவும் தெரிவிக்கப்பட்டுள்ளது.

சான்றுகள் எதிர்வரும் ஒரு வார காலத்திற்கு பொலிஸாரின் பாதுகாப்பில் இருக்க நடவடிக்கைகள் மேற்கொள்ளப்பட்டுள்ளன.

கிடைக்கப்பெறுகின்ற அறிக்கைகளை வைத்துக்கொண்டு மீட்கப்பட்ட எலும்புக்கூடுகள் தொடர்பில் தீர்மானிக்கப்படும்.

சிறுவர்களுடைய எலும்புகள், அல்லது கைவிலங்கிடப்பட்ட எலும்புகள் மற்றும் குவியலாகக் கிடந்த எலும்புகள் போன்றவற்றில் இருந்து எடுக்க முடியுமா? என்பது தொடர்பில் தீர்மானம் எடுக்கப்பட்டுள்ளது' என்றார்.

மன்னார்   நீதவான் ரி.சரவணராஜா தலைமையில் இடம்பெற்ற கூட்டத்தில் காணாமல் ஆக்கப்பட்டோர் அலுவலகத்தின் தலைவர் சாலிய பீரிஸ் உள்ளிட்ட ஆணையாளர்கள், சட்டவைத்திய அதிகாரி சமிந்த ராஜபக்ஸ,  போராசிரியர் ராஜ் சோம தேவ, காணாமல் ஆக்கப்பட்ட உறவுகள் சார்பாக வாதிடும் சட்டத்தரணிகள், காணாமல் ஆக்கப்பட்ட உறவினர்களை தேடும் சங்க பிரதிநிதிகள், அழைக்கப்பட்ட திணைக்கள அதிகாரிகள் என பலர் கலந்துகொண்டிருந்தனர்.

(றொசேரியன் லம்பேர்ட் மன்னார் குறூப் நிருபர்)


Add new comment

Or log in with...