அழிவின் விளிம்பில் புதிய தலைமுறையினர் | தினகரன்

அழிவின் விளிம்பில் புதிய தலைமுறையினர்

போதைவஸ்துக்கள், அபாயகரமான போதைவஸ்துக்கள் இளம் தலை முறையினரை காவு கொள்ளும் பிரதான சவாலாக மாறி வருகின்றது.

இலங்கை மக்கள் எதிர் நோக்கியுள்ள மிகப் பெரும் சவாலாகவும் போதைப் பொருள் பாவனை மாறி வருகிறது, தினமும் 45கோடி ரூபாய்கள் போதைபொருள் பாவனைக்காக செலவிடப்படுவதாக தரவுகள் தெரிவிக்கின்றன. கொழும்பு மற்றும் நகர்ப்புறங்களில் பாரிய சவாலாக இருந்த அபாயகரமான போதை வஸ்து வியாபாரம் மற்றும் பாவனை நாளுக்கு நாள் பல்வேறு நூதனமான வடிவங்களில் நாட்டின் கிராமப் புறங்களையும் மூளை முடுக்குகளையும் ஊடுருவி பரவியுள்ளது.

இன்று பாடசாலைகள் இலக்கு வைக்கப்பட்டுள்ளன. வழமையான போதை வஸ்துக்கள் அன்றி டொஃபி, ச்விங்கம், இனிப்பு பானங்கள், வில்லைகள் என பலவேறு வடிவங்களில் போதை வஸ்துக்கள் சூட்சுமமாகசந்தைப்படுத்தப்பட்டு பிள்ளைகள் போதைகளின்அடிமைகள் ஆக்கப்படுகின்றனர் வீட்டு சூழல் பாதுகாப்பானது என்று மட்டும் இருந்து விடாதீர்கள், வெளியுலகம்  மேலதிக வகுப்புக்கள்  ஏன் பாடசாலை வளாகங்கள் கூட உங்கள் பிள்ளையை காவு கொள்ளலாம், அவர்களுடன் நெருக்கமாக இருங்கள், அவர்களுக்கு அன்பாக ஆபத்துக்களை எடுத்துச் சொல்லுங்கள், அவர்களது நடத்தைகளில் அவதானமாக இருங்கள்.

அவர்களது பாடசாலை நட்புக்கள்  புதிய சமூக வலைத்தள நட்புக்கள் குறித்த அவதானம் தேவை, போதை வஸ்துடன் பாலியல் துஷ்பிரயோகத்திற்கும் இளம் சிறார்கள் பதின்ம வயதினர் ஆளாகின்றனர்.

எவ்வாறு உலகில் ஆயுத உற்பத்தியாளர்கள் இன, மத மொழி வேற்றுமைகளில் முதலீடு செய்கிறார்களோ அதே போன்றே போதை வஸ்து உற்பத்தியாளர்களும் ஒரு சமூகத்தின் இளம் மற்றும் மாணவ சமூகத்தை இலக்கு வைத்து அழிப்பதற்கு போதை வஸ்துக்களை ஆயுதமாக பயன்படுத்த இன, மத வெறியர்களை தூண்டுகிறார்கள்.

சமூக ஊடகங்கள் இன்னுமொரு வகையான போதையை, மதிமயக்கத்தை இளம் தலைமுறையினர் மத்தியில் ஏற்படுத்தி வருகின்றன.

ஆன்மீக நம்பிக்கைகள் குன்றிய பொருளாதாரப் பிராணியாக ஒரு சமூகம் மாறுவது குறித்து கடந்த காலங்களில் அதிகம் பேசப்பட்டது.

இப்பொழுது ஆன்மீக நம்பிக்கைகள் அற்ற பொருளாதாரமும் அற்ற சைபர் உலகில் மதிமயங்கி சஞ்சாரம் செய்யும் ஒரு தலை முறை உருவாகி வருகிறது. அதேபோன்றே சகலவிதமான சன்மார்க்க குடும்ப சமூக கட்டுக் கோப்புகளையும் தகர்த்தெறியும் ஒரு (தறுதலை)  தலை முறை உருவாகி வருகிறது. போதை வஸ்துக்கள், அபாயகரமான போதை வஸ்துக்கள் புதிய சந்ததியினரை இலக்கு வைத்து காவு கொண்டு வருகிறது.

இறையச்சம் தக்வா உடையவர்களுக்கு மாத்திரமே இஸ்லாம் மேற்படி அபாயகரமான தீங்குகளில் இருந்து அபயம் அளிக்கிறது.

இறையச்சம் ஒன்றே அழிவின் விளிம்பில் இருந்து எமது குழந்தைச் செல்வங்களை சந்ததிகளை பாது காத்திட முடியும். மது மற்றும் போதை வஸ்து பாவனைகளில் இருந்து சமூகத்தை காப்பது ஒவ்வொரு உறுப்பினரினதும் கடமையாகும்.

யுகத்தின் புதிய நூதனமான சவால்களுக்கு முகம் கொடுக்கும் மத்திய நிலையங்களாக மஸ்ஜிதுகள் மாறுதல் வேண்டும், மிம்பர் மேடைகள் வலுவூட்டப்படல் வேண்டும்.

(அபூ  தஹானி)


Add new comment

Or log in with...