ஒரு கோப்பை பாலுக்காக அனுபவிக்கும் சித்திரவதை! | தினகரன்

ஒரு கோப்பை பாலுக்காக அனுபவிக்கும் சித்திரவதை!

உலகின் மொத்தப் பால் தேவைகளையும் முக்கால்வாசிக்கு மேல் தன்னிறைவு அடையச் செய்வது பண்ணையில் வளர்க்கப்படும் கால்நடைகளேயாகும். பண்ணையில் கால்நடைகள் வளர்க்கப்படுவதன் முக்கிய காரணம் பால் மற்றும் இறைச்சிக்காக என்பது நம் அனைவருக்குமே தெரிந்த செய்தி.

தினமும் இரவில் உறங்கச் செல்லும் முன்னர் ஒரு கோப்பை பால் அருந்தினால் உறக்கம் நன்றாக வரும், குழந்தைகள் தினமும் பால் அருந்தினால் அவர்களது பற்கள் மற்றும் எலும்புகளுக்குத் தேவையான கல்சியத் தேவையை பால் ஈட்டித் தரும் என்பதெல்லாம் நமக்குத் தெரிந்தவையே. இவையெல்லாம் கிராமங்களைப் பொறுத்தவரை வீட்டில் உள்ள தொழுவத்தில் குறைந்த எண்ணிக்கையில் வளர்க்கப் படும் கால்நடைகளில் இருந்து கிடைத்தால் பரவாயில்லை. கன்று அருந்தியது போக மிச்சப்படும் பாலை மனிதன் அருந்தினால் என்ன தவறு என்பது கூட நியாயமான வாதமே!

ஆனால் என்றைக்கு ஒரு விஷயம் குடும்பத் தேவை என்பதிலிருந்து மாறி பணம் கொழிக்கும் தொழிலாகப் பரிணமிக்கிறதோ அப்போதே அதில் மனிதம் செத்து விடுகிறது. இதற்கு கால்நடைப் பண்ணைகளைத் தவிர மிகச் சிறந்த வேறு உதாரணங்கள் கிடைத்து விட முடியாது.

கால்நடை வளர்ப்பு தொடர்பான ஆய்வுக் கட்டுரை ஒன்று பண்ணைகளில் கால்நடைகள் நடத்தப்படும் விதத்தின் இரக்கமற்ற தன்மையையும், அபத்தங்களையும், ஆபத்துக்களையும் கண்கூடாகப் பதிவு செய்திருக்கிறது.

பண்ணையில் கால்நடைகள் வளர்க்கப்படுவதற்கு எனச் சில விதிமுறைகள் உள்ளன. ஆனால் உலகில் உள்ள பெரும்பான்மையான பண்ணைகளில் அந்த விதிகள் நடைமுறைப்படுத்தப்படுவது இல்லை. பண்ணையில் குறுகிய இடங்களில் வளர்க்கப்படும் கால்நடைகள் சர்வ காலமும் கயிற்றால் பிணைத்துக் கட்டப்பட்டுள்ளன. தான் கழிக்கும் சாணம் மற்றும் சிறுநீர் ஈரத்தில் படுத்து எழுந்து ஊறித் திளைத்து நோய் நொடிகளுடன் வாழ நிர்ப்பந்திக்கப்படுவதாக அந்த ஆய்வுக் கட்டுரையில் புகைப்படமும் வெளியிடப்பட்டுள்ளது.

இவ்வாறான பண்ணைகளில் இருந்து பெறப்படும் பாலில் இருந்துதான் எமக்கான பாற்பொருட்கள் அத்தனையும் வந்து சேருகின்றன.

இப்படி வளர்க்கப்படும் மாடுகளில் பசுக்கள் மற்றும் எருமைகள் சினையாவதற்கு இயற்கையான இனப்பெருக்க முறையை நாடாமல் ஆண் மாடுகளிடமிருந்து செயற்கையான முறையில் விந்தணுக்கள் பெறப்பட்டு அவற்றை ஊசி மூலமாக பசுக்கள் மற்றும் எருமைகளின் கருப்பைக்குள் செலுத்துகிறார்கள். கால்நடைகளுக்கும் பாலியல் உணர்வுகள் உண்டு. அவற்றை அனுபவிக்கும் சுதந்திரம் அவற்றுக்கும் உண்டு என்பதே மரபுவழியான கால்நடை வளர்ப்பு சொல்லும் நீதி. ஆனால் பண்ணைகளில் இந்த முறைமை நிராகரிக்கப்பட்டு செயற்கையாக பசுக்களும், எருமைகளும் கருத்தரிப்புக்கு ஆளாக்கப்படுகின்றன.

சில நாடுகளில் இன்னொரு பரிதாபம் இடம்பெறுவதாக தகவல் கிடைத்திருக்கிறது. இறைச்சித் தேவையை மட்டுமே உத்தேசித்து ஆண் கன்றுகள் பிறந்த அடுத்த கணமே தாயிடமிருந்து பிரிக்கப்பட்டு தனியே வளர்க்கப்படுகின்றன. இந்தக் கன்றுகளைக் காணாமல் தாய்ப்பசுக்கள் பால் தருவதில் சிக்கல் நேர்ந்தால் முன்பே இறைச்சிக்காக வெட்டப்பட்டு தோல் உரிக்கப்பட்டு சேமிப்பில் இருக்கும் கன்றுகளின் தோலுக்குள் வைக்கோலைத் திணித்து பொய்யாக ஆண் கன்றுகள் உருவாக்கப்பட்டு பண்ணைகளின் உயரமான ஓரிடத்தில் நிறுத்தப்படுகின்றன.

இந்த வைக்கோல் கன்றைக் காட்டி தாய்ப்பசுக்களிடம் பால் கறக்கும் அவலமும் சில நாடுகளில் உள்ள பண்ணைகளில் அதிகளவில் நீடிக்கிறது. பிரசவ காலத்தில் கன்றுகள் இறந்து விட்டால் தாய்ப்பசுக்களின் துயரம் தீர்க்க உருவாக்கப்பட்ட முறை இது. ஆனால், இன்றைய வியாபார தந்திர உலகில் கன்றுகள் திட்டமிட்டு இறைச்சிக்காக விற்கப்பட்டு 'வைக்கோல் கன்று' நாடகம் நடத்தப்பட்டு தாய்ப்பசுக்களிடம் பாலை அபகரிக்கும் துஷ்பிரயோகம் இடம்பெறுகிறது. எமது அயல் நாடான இந்தியா முழுதும் பல்வேறு கால்நடைப் பண்ணைகளில் இவ்வாறான நடைமுறை இருப்பதாக அந்த ஆய்வுக் கட்டுரை தெரிவிக்கிறது.

பசுக்களிடமிருந்து பால் சேகரிக்க 'வைக்கோல் கன்று' தந்திரம் உதவவில்லை எனில், பசுக்களுக்கு ஒக்சிடோஸின் எனும் மருந்து ஊசி மூலமாகச் செலுத்தப்படுகிறது. இந்த மருந்து செயற்கை முறையில் பசுக்களில் பால் உற்பத்தியை அதிகரிக்கும் என சில பண்ணை உரிமையாளர்கள் மூடத்தனமாக நம்புகிறார்கள். இந்த மருந்துக்கு அப்படியான திறன்கள் எல்லாம் இல்லை. மாறாக இந்த ஆபத்தான மருந்து பசுக்களுக்குச் செலுத்தப்படுவதால் அவற்றின் இனப்பெருக்கத் தன்மை வெகுவாகக் குறைவதோடு பசுக்களின் ஆயுளும் குறைகிறது.

ஒக்சிடோஸின் மருந்து செலுத்தப்பட்டு கறக்கப்பட்ட பாலை அருந்தும் மனிதர்களும் உடலில் ​ேஹார்மோன் ஏற்றத்தாழ்வு ஏற்பட்டு தீவிர நோய்த்தாக்குதலுக்கு உள்ளாகின்றனர். இந்த உண்மைகள் தெரிந்திருந்த போதிலும் பால் விற்பனை மூலம் ஈட்டும் பணத்துக்காக பண்ணை உரிமையாளர்கள் சர்வசாதாரணமாக இந்த இரசாயனத்தைப் பயன்படுத்தும் காரியம் உலகில் இடம்பெறுகிறது.

கார்த்திகா வாசுதேவன்


Add new comment

CAPTCHA
This question is for testing whether or not you are a human visitor and to prevent automated spam submissions.
Image CAPTCHA
Enter the characters shown in the image.

Or log in with...