மஹிந்தவின் பிரதானி உள்ளிட்ட மூவருக்கும் விளக்கமறியல் நீடிப்பு | தினகரன்

மஹிந்தவின் பிரதானி உள்ளிட்ட மூவருக்கும் விளக்கமறியல் நீடிப்பு

 

முன்னாள் ஜனாதிபதி மஹிந்த ராஜபக்ஷவின் அலுவலக பிரதானி காமினி செனரத் உள்ளிட்ட மூவருக்கு எதிர்வரும் நவம்பர் 21 ஆம் திகதி வரை விளக்கமறியல் நீடிக்கப்பட்டுள்ளது.

குறித்த சந்தேகநபர்கள் மூவரும் இன்று (15) கொழும்பு கோட்டை நீதவான் லங்கா ஜயரத்ன முன்னிலையில் ஆஜர்படுத்தப்பட்டபோதே நீதவான் குறித்த உத்தரவை வழங்கினார்.

காமினி செனரத் மற்றும் இலங்கை காப்புறுதி கூட்டுத்தாபனத்தின் முன்னாள் பணிப்பாளரான பியதாச குடாபாலகே மற்றும் நீல் ஹபுஹின்ன ஆகிய மூவருக்கே இவ்வாறு விளக்கமறியல் நீடிக்கப்பட்டது.

காமினி செனரத் மற்றும் நீல் ஹபுஹின்ன ஆகிய சந்தேகநபர்களுக்காக முன்னிலையான சட்டத்தரணிகளால், அவர்களுக்காக பிணை கோரப்பட்டதோடு, இரண்டாவது சந்தேகநபரான பியதாச குடாபாலகே தொடர்பில் இன்று (15) பிற்பகல் பிணை கோரிக்கை முன்வைக்கப்படும் என தெரிவிக்கப்பட்டது.

அதன் அடிப்படையில் குறித்த நபர்கள் தொடர்பான பிணை தொடர்பில் எதிர்வரும் 21 ஆம் திகதி ஆராயப்படும் என நீதிபதி தெரிவித்தார்.

இலங்கை காப்புறுதி கூட்டுத்தாபனத்தின் கீழ் நிர்மாணிக்கப்படும் கொள்ளுபிட்டியவிலுள்ள நினோ லங்கா ஹோட்டல் திட்டம் தொடர்பில் 2012 ஆம் ஆண்டு வழங்கப்பட்ட அமைச்சரவை அனுமதியுடன் ஒதுக்கப்பட்ட ரூபா 18.5 பில்லியன் நிதியிலிருந்து ரூபா 4 பில்லியனை சட்டவிரோதமாக அம்பாந்தோட்டை பிரதேசத்திலுள்ள மற்றுமொரு ஹோட்டல் திட்டத்திற்கு பயன்படுத்தியதன் மூலம் அரசாங்க நிதியை முறையற்ற வகையில் பயன்படுத்தியதாக தெரிவித்து இவர்களுக்கு எதிராக குற்றச்சாட்டுகள் முன்வைக்கப்பட்டுள்ளன.

குறித்த மூவரும் கடந்த நவம்பர் 13 ஆம் திகதி, கொழும்பு கோட்டை நீதவான் நீதிமன்றில் தங்களது சட்டத்தரணிகளுடன் சரணடைந்திருத்தமை குறிப்பிடத்தக்கது.

 


Add new comment

CAPTCHA
This question is for testing whether or not you are a human visitor and to prevent automated spam submissions.
Image CAPTCHA
Enter the characters shown in the image.

Or log in with...